كيفية استخراج شهادة خبرة لصيدلي حكومي
هكلمكم عن تجربتي في استخراج شهادة خبرة من الحكومة وبالأخص للصيدلى الحكومى "حسب خبرتي الشخصية"
عليك بالخطوات التالية:
1. خطاب من الشغل اللي انت فيه حاليا أيا كان مستشفي حكومي او وحدة صحية
إفادة معتمدة ومختومة من الجھة التي عمل بھا الصيدلي و فترة العمل التى يرغب فى إثباتھا بشھادة الخبرة.
سواء كانت في صيدلية اهلية (تعتمد من ادارة الصيدلة في محافظتك) او حكومية (تعتمد من جهة عملك)
تطلب من مكان الشغل أيضا مفردات مرتبك من غرفة (الحسابات) او تستخرج ورقة تثبت بالمبالغ المالية الي اخذتها بالفيزا بتاعتك كل شهر. تمضيها وتختمها من مكان شغلك. لو الموظف غلس عليك وقالك لازم ورقة مفردات المرتب تكون موجهة لمكان معين، قلهم يكتبوا أنها موجهة لمديريتك التابع لها.
2. تروح لمديرية الصحة التابع ليها جهة شغلك وتسال علي غرفة الموارد البشرية وتطلب من الموظف استخراج شهادة خبرة موجهة لدولة كندا وهيجهزهالك في نفس اليوم او اليوم الي بعده مختومة وجاهزة بعدد سنين عملك واماكن العمل.
تسال في غرفة (شئون العاملين) عن المواصفات المهنية لوظيفتك كصيدلي حكومي مثلا و هتروح لغرفة اسمها (الموازنة). هتسال على ورقة المهام الوظيفية حسب درجتك المالية او الوظيفية وتصورها. وعليك انك تختمها كصورة طبق الاصل من المديرية أو مكان شغلك.
عرفت تجيب الورقة دي خير وبركة معرفتش مش مهم .. المهم الورقة الاخيرة اللي هقولهالك دي.
3. تروح الإدارة المركزية للصيدلة بالقاهرة … بالمنيل
تاخد ورقة معاك تكتب فيها المهام الوظيفية بالانجليزي وتحاول تخليها شبه المهام في النوك تبع موقع الهجرة
هيطلبوا منك افادة من العمل و تفاصيل تواريخ استلام الوظيفة و الاماكن اللي عملت بيها دي تحاول تكتبها في الافادة او تديهم الافادة مع شهادة الخبرة اللي طلعتها من مديرية الصحة
وتسلمهم كمان ورقة المهام الوظيفية
و هيطلعلك ورقة الخبرة في نفس اليوم او تاني يوم
وممكن تكتفي برفع شهادة الخبرة من المديرية فقط وهي كافية مع مفردات المرتب من مكان العمل وده اللي انا عملتك و مشت الحمد لله.
أو
ارفع التلات ورقات علي الموقع ومعاهم حاجة اسمها (Clarification Letter) عشان توضح للاوفيسر ايه سبب انك حاطط 3 ورقات مش ورقة واحدة. والخطوة دي للتوضيح وللامان اكتر.
بالتوفيق للجميع ان شاء الله
No comments:
Post a Comment